Usa ka ginang gipusil sa iyang sa silingan sa Stop Proper Alaska, Brgy. Mambaling, dakbayan sa Sugbo, alas 3:38 sa kaadlawon sa Huwebes, Marso 14, 2024.
Ang biktima giila nga si Niña Borja, hingkod, dunay mga anak apan gipusil-patay niadto ang kapuyo, nakaangkon og samad pinusilan sa ulo.
Atol ning pagsuwat, talandugon ang iyang kahimtang sud sa usa ka publikong ospital sa dakbayan.
Samtang, ang suspek nga si Emanuel ‘Awing’ Dimoy, 22, ulitawo, nagpuyo sa nahisgutang lugar, napusilan-patay dihang nisukol sa kapulisan nga nilusad og hot pursuit.
Nakuha sa kapulisan ang .38 kalibre nga revolver sa suspek nga dunay tulo ka mga bala ug usa ka kabhang.
Si Major Jonathan Taneo, hepe sa Mambaling Police Station nga nahinabi sa Superbalita Cebu, niingon nga nag-inusara sud sa internet cafe ang biktima.
Sumala sa taho, ang biktima nakig-chat sa usa ka afam o langyaw nga lalaki sa internet dihang gipusil sa suspek.
Sa imbestigasyon sa kapulisan, ang biktima giingong nakadawat na og hulga nga ‘hipusonon’ human gidudahan nga asset sa kapulisan hinungdan nga daghang nangadakpan sa ilang dapit.
Apan laing anggulo nga gisubay sa kapulisan nga ang taho nga ‘dunay relasyon’ ang biktima ug suspek.
Kon maayo na ang kahimtang sa biktima, matod ni Taneo, ilang susihon kon unsay kamatuoran niini.
Gibutyag ni Taneo, armed and dangerous ang suspek ug gikataho nga gikahadlukan sa ilang lugar samtang nalambigit usab sa drugas ug ubang krimen.
Gipasabot ni Taneo, ang iyang mga personnel ningdepensa lang hinungdan nga napusilan ang suspek. / GPL