Ginang patay sa sunog

NAPAIG: Mao kini ang nahabilin sa lawas ni  Leonilda Agbon Hambalos, 36, minyo, human naapil sa pagkasunog sa balay sa iyang ugangan sa Dominggo sa gabii. /
NAPAIG: Mao kini ang nahabilin sa lawas ni Leonilda Agbon Hambalos, 36, minyo, human naapil sa pagkasunog sa balay sa iyang ugangan sa Dominggo sa gabii. / TAMPO ni FO2 Boy George Lao

Naapil sa pagkasunog ang usa ka ginang sa pagkasunog sa balay sa iyang ugangan alas 11:30 sa Do­minggo sa gabii, Marso 31, 2024 sa Brgy. Tubod-Dugoan, bukiran sa lungsod sa Dumanjug, habagatang kasadpang Sugbo.

Sa pagkighinabi sa Superbalita Cebu kang F02 Boy George Lao, fire investigator sa Bureau of Fire Protection (BFP) sa Dumanjug, iyang giila ang biktima nga si Leonilda Agbon Hambalos, 36, minyo.

Matod ni Lao nga sa iyang pasiunang imbestigasyon, ang biktima nahinanok sa pagkatulog sa iyang kuwarto nga siya rang usa kay wa ang bana tua nagtrabaho sa Japan.

Hayan na-trap ang biktima sa dihang niulbo ang sunog nga nagsukad sa kuwarto sa iyang ugangan nga si Antonina Ponce, apan wa natulog sa iyang kuwarto kay didto sa lain niyang balay.

Si Lao niingon nga dos andas ang balay ni Ponce nga gama sa kahoy ug semento.

Ang sunog giisa sa first alarm sa alas 12:10 sa kaadawon ug nakontrolar paglabay sa 20 minutos ug hingpit nga napawong mga alas 12:55 sa kaadlawon.

Nibilin kini og danyos nga gibana-bana nga moabot og P84,000.

Si Lao nagduda nga electrical short circuit ang hinungdan sa sunog kay daan na kaayo ang balay kay iya pa sa mga ginikanan ni Ponce apan gi-renovate na lang.

Dugang ni Lao nga dako na ang kayo sa ilang pag-abot kay sa pagdawat nila sa alarma, nidagan pa sila og 35 minutos gumikan sa ka layo sa maong dapit.

TALISAY

Upat ka mga balay sa Campo 2 , Brgy. Jaclupan, siyudad sa Talisay ang nangasunog alas 8:50 sa Dominggo sa gabii, Marso 31, 2024.

Kini ang gibutyag ni F01 Jerome Datulaota, fire investigator sa Talisay City Bureau of Fire Potection (BFP) nga gikahinabi sa Superbalita Cebu.

Matod niya nga upat ka mga balay ang nangasunog, tulo niini naugdaw samtang ang usa nakan-an lang sa kayo.

Ang balay diin nagsugod ang sunog gipanag-iya ni Saturnino Nacua, giisa sa first alarm sa alas 8:57 sa gabii ug hingpit nga napawong sa alas 9:24 sa gabii.

Kini nibilin og danyos nga P375,000 apan ubos pa sa imbestigasyon aron sa pagsuta kon unsay hinungdan sa sunog. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph