Usa na lang ka daog ug mobalik na sa trono ang Brgy. Ginebra Gin Kings.
Kini human gipanghubog sa Gin Kings ang TNT Tropang Giga, 73-66, sa Game 5 nga nakahatag kanila og 3-2 nga bintaha sa best-of-seven championship series sa Philippine Basketball Asociation (PBA) Season 49 Commissioner’s Cup niadtong Dominggo sa gabii, Marso 23, 2025, sa Smart Araneta Coliseum.
Naangkon sa Gin Kings ang daog bisan padayon nga gihasol ang ilang resident import nga si Justin Brownlee sa angol sa iyang tuo nga kumagko.
Bugnaw pa kaayo ang duwa ni Brownlee sa 1st half diin igo lang siyang nakatali og 1-of-5 field goal tungod sa tataw nga rason – angol sa iyang kamot.
“We all knew from our side that Justin was struggling a little bit more with his hand today than he was in the last game. I think everybody had to learn how to step up,” matod ni Gin Kings coach Tim Cone nga napatik sa Spin.ph.
Hinuon, hinayhinay nga nanginit si Brownlee pagsugod sa 2nd half ug nakamugna siya og sunodsunod nga mga puntos sa krusyal nga bahin sa kombati.
Taliwala sa iyang kondisyon, napangulohan ni Brownlee ang Gin Kings pinaagi sa iyang 18 puntos ug 14 rebounds.
Ang haw-ang sa duwa ni Brownlee gibawi sa Gin Kings pinaagi sa ilang depensa nga usa sa dakong mga hinungdan nga nakuha nila ang daog.
Nanghinaot si Cone nga dili na kaayo makaapekto sa duwa ni Brownlee ang iyang angol sa Game 6 nga kumbatihon ugma.
Puntos matag usa:
Ginebra (73) - Brownlee 18, Thompson 16, J.Aguilar 11, Ahanmisi 11, Rosario 6, Malonzo 6, Holt 3, Abarrientos 2.
TNT (66) - Hollis-Jefferson 19, Nambatac 19, Oftana 8, Pogoy 8, Aurin 8, Erram 4. Quarters: 17-24, 35-45, 57-56, 73-66. / ESL