Mga duwa karon:
5:00 pm- Blackwater batok Rain or Shine
7:30 pm- Ginebra batok NLEX
Ipadayon og suway sa NLEX Road Warriors ang pagsubay sa tul-id nga dalan sa ilang pagpakigsangka sa Brgy. Ginebra Gin Kings sa main game karong Miyerkules, Mayo 7, 2025, sa Philippine Basketball Association (PBA) Season 49 Philippine Cup sa Ninoy Aquino Stadium.
Human sila nabangga sa labing una nilang tahas batok sa San Miguel Beermen, 89-98, ang Road Warriors ningbulhot ug ilang gipangligsan ang nagsunod nilang mga kontra nga mao ang Rain or Shine Elasto Painters, 109-95, Grandslam-seeking TNT Tropang 5G, 91-74, ug Blackwater Bossing, 80-72.
Bitbit ang 3-1 nga rekord, ang Road Warriors ningsaka sa ikaduhang luna sunod sa league-leader Magnolia Chicken Timplados Hotshots, nga adunay perpektong rekord nga 5-0.
Batok sa Gin Kings nga adunay 2-1 nga rekord, ang Road Warriors nangandam sa laing malisod nga dalan nga ilang pagasubayon.
“Mabigat yung tatlong games namin, at dito kami masusubukan talaga,” matod sa lider sa Road Warriors nga si Robert Bolick nga napatik sa www.pba.ph.
Sa premirong duwa, magsangka ang Elasto Painters ug Bossing.
Ang Elasto Painters mosagubang ning sangkaa nga adunay maayo ug mangil-ad nga mga kalambuan.
Ang maayo, makaduwa na og balik sila si center Beau Belga ug power forward Caelan Tiongson.
Ang mangil-ad, dili seguradong makaduwa sila si Sedrick Barefield (hamstring) ug Christian David (ankle sprain).
Taliwala niini, makonsiderar gihapon nga inilog ang Elasto Painters batok sa Bossing.
“Blackwater is still a dangerous team. They have the materials to contend with the stronger teams if they’re 100 percent, injury-free,” matod ni Elasto Painters coach Yeng Guiao. / ESL