Nabalhog na sa bilanggoan ang ginikanan nga maoy nagbaligya sa ilang bag-ong nahimugso nga anakn nga babaye sa sulod sa Cebu City Medical Center niadtong Marso 6, 2025, human sila masikop sa managlahi nga adlaw ug police station sa Dakbayan sa Sugbo pinasikad sa warrant of arrest nga giluwatan sa korte.
Ang labing uwahi nga nadakpan ang 44-anyos nga inahan nga si alyas Melda, taga Second Street, Barangay Duljo-Fatima sa ala 1:28 sa hapon, Miyerkules, Hulyo 23, 2025.
Ang mga sakop sa Mambaling Police Station nakadawat sa warrant of arrest nga giluwatan ni Judge Leah Iligan Geraldez ang Presiding Judge sa Regional Trial Court Branch 20, 7th Judicial Region sa Dakbayan sa Sugbo pinetsahan niadtong Hulyo 18, 2025, sa kalapasan sa Section 4 sa Republic Act 11862 o Expanded Anti-Trafficking in Person Act of 2022.
Human nadawat ang mga warrant of arrest batok sa ginikanan, nag-umol dayon ang kapulisan og tracker team nga maoy mangita kanila.
Silang alyas Bungot ug Melda gitugotan nga makapiyansa sa korte og balor P200,000 ang matag usa kanila alang sa ilang temporaryong kagawasan. / AYB