Suwayan na paglangkat sa Brgy. Ginebra Gin Kings ang kampyunato sa ilang pagpakigsangka og balik sa TNT Tropang Giga karong Miyerkules sa alas 7:30 sa gabii, Marso 26, 2025, sa Game 6 sa Philippine Basketball Association (PBA) Season 49 Commissioner’s Cup finals series sa Smart Araneta Coliseum.
Sa pagpangulo nila ni import Justin Brownlee ug Scottie Thompson, ang Gin Kings nakamugna og 73-66 nga daog sa Game 5 nga nakahatag kanila og 3-2 nga bintaha sa best-of-seven series.
Ning higayuna, dako na og kahigayunan ang Gin Kings nga makabawos sa Tropang Giga, nga ninglupig kanila sa niaging duha ka finals series diin nag-abot ang duha ka mga kampo.
Dili ikalimod nga adunay dili maayong epekto ang panagbikil nila ni TNT coach Chot Reyes ug big man Poy Erram atol sa ilang pagkapilde sa Game 5.
Hinuon, gilaumang nahibalik na ang maayong buot nila ni Reyes ug Erram alang ning ilahang tungason nga misyon.
Taliwala sa ilang sitwasyon, ang Tropang Giga nipadayag sa ilang determinasyon nga madaog ang series.
“I see us fighting like hell, fighting to win, fighting to play an excellent game, fighting to give maximum effort all 48 minutes, whether we go up or not, and just staying locked in,” matod ni TNT import Rondae Hollis-Jefferson nga napatik sa www.pba.ph.
Alang sa Gin Kings, dili na nila hatagan og laing kahigayunan ang Tropang Giga nga makabangon sa series.
“We will come and try with all our might to clinch it,” asoy ni Brownlee. “TNT is a great team as the past has shown. They beat us two times in the finals so we know it’s not going to be easy.” / ESL