Gidudahan sa kabanay niadtong 33 anyos nga lalaki nga gipaak sa lala nga mananap nga miresulta sa kamatayon.
Ang insidente gituhoan nga nahitabo ala 1:00 sa kaadlawon, Oktubre 21, 2024 sa Barangay Tuyokon, lungsod Aloguinsan, Sugbo ang biktima giila nga si Jufffer Jordan Albopera, 33.
Base sa imbestigasyon ni PCPT Noah Añana, hepe Aloguinsan Police Station nga ang anak sa namatay misaysay nga migawas sa ilang balay si Juffer paingon sa kalibunan aron sa pagtuman sa sugo sa lawas ug mipauli ug natulog og balik. Apan nahibulong ang asawa nianang pagkaadlawan nga wa na makamata si Juffer sa dihang gipukaw.
Matod pa ni Añana nga ang PNP SOCO team mihiling sa lawas sa namatay ug nasuta nga aduna kini pinaakan, ug ang asawa nagkanayon nga way sakit ang iyang bana nga posible nga giatake.
Giingong mibalibad ang pamilya sa sugyot nga ipaubos sa autopsy ang lawas aron sa pagtino sa hinungdan sa kamatayon niini. / DVG