Gipahimuslan sa 23 anyos ang kamaayo’ng tawo sa menor de edad nga lalaki nga ni-share sa iyang burger, human nga nangayo ang suspek og pagkaon kay kuno gigutom.
Inay magpasalamat ang suspek ngadto sa batan-on, gidagan na hinuon niini ang cellphone sa biktima.
Maayong na lang kay nadakpan ang suspek sa mga nagpatrolya nga mga polis, Miyerkules sa 5:00 sa kaadlawon, Agusto 7, 2024.
Ang suspek nailhan nga si Christopher Carbonilla Ladeon, 23, ulitawo nga taga-Phase 3 Deca Homes, Barangay Dumlog, Dakbayan sa Talisay.
Samtang ang biktima usa ka 17 anyos, tinun-an sa Alternative Learning System (ALS) nga taga-Sityo Tabada, Brgy. Mambaling, Siyudad sa Sugbo.
Asoy sa biktima sa Superbalita Cebu nga nigawas siya sa ilang balay aron mokaon ngadto sa duol nga burger station sa ilang dapit, apan usa ka lalaki ang kalit nga miduol kaniya.
Giingo’ng nangayo og pagkaon si Ladeon ug gihatagan og burger sa biktima, wa pa makontento nangayo sab kini og kuwarta ug gihatagan og P60.
CELLPHONE
Wa magdugay nanghuwam si Ladeon og cellphone nga bitbit sa biktima kay aduna lang siya'y tawgan, apan wa kini makakontak kay way load ang maong gadget.
Saysay sa biktima nga gipugos pa siya ni Ladeon nga pa-loadan ang maong cellphone kay importante ang iyang tawagan, apan iyang gibalibaran kay sirado pa ang tindahan nga namaligya og phone load.
Apan gipangutana ang biktima sa suspek kon nakaila ba kini sa edaran nga babaye nga nanilhig sa kalsada niadtong higayona.
Sa dihang gilingi sa biktima ang giingong babaye, mikaratil gilayon sa pagdagan si Ladeon dala ang cellphone sa batan-on.
Suway nga gigukod sa biktima ang suspek dungan sa pagpangayo og tabang, apan wa kini niya maabti.
NAAY NAG-ROVING
Atol nga nag-roving sila si Police Staff Sgt. Jonas Ricaplaza ug Police Staff Bryan Romagos, sa Mobile Patrol sa Mambaling Police nga maoy migukod sa kawatan hangtod nga nadakpan.
Nabawi ang cellphone nga mokantidad sa P3,599.
Gisubay karon sa Mambaling Police Station ang background ni Ladeon kinsa way klarong tubag sa mga pangutana kinsa gidudahan nga 'sabog'.
Giingong nagsukol-sukol pa sa polis sa dihang kuhaan og mugshot nga maoy proseso sa higayon nga adunay dinakpan, kay matod pa katungod niya nga mobalibad nga dili magpa-picture.
Ang suspek gitanggong sa buhatan sa kapulisan ug gikatakda nga pasakaan og tukmang kaso kalabot sa iyang pagsakmit sa cellphone sa biktima nga nagpakaon pa niya. / GPL