USA ang namatay, samtang laing usa ang anaa sa talandugon nga kahimtang human pamusila ala 1:35 sa kaadlawon, Biyernes, Pebrero 7, 2025 sa Sitio Baskio, Barangay Basak Pardo sa Siyudad sa Sugbo.
Ang mga biktima giila nga silang Christopher Llaban alyas Tope, kinsa namatay diha-diha, samtang anaa sa kritikal nga kondisyon si Jenny Gemang, usa ka tomboy, pulos taga Barangay Quiot sa Dakbayan sa Sugbo.
Base sa imbestigasyon sa Inayawan Police Station, misulod sa usa ka panimalay ang duha sa Sityo Baskio, sudlonong bahin sa Barangay Basak Pardo, apan kalit lang sila nga gipamusil.
Naigo sa kalawasan si Tope nga miresulta sa iyang hinanaling kamatayon, samtang si Jenny nakadagan pa ug misulod sa usa ka balay apan gigukod ni sa wala pa mailhing suspek ug gipusil.
Matud ni Dave Tumulak, ang kapitan sa Barangay Basak Pardo, nga ilang naabtan ang biktima nga si Jenny sa ikaduhang andana sa usa ka balay nga nagbuy-od unya dunay samad pinusilan sa ulo ug lawas.
Dali sila nga nanawag og ambulansya ug gidala kini sa Cebu City Medical Center nga gihulagway ni Tumulak nga lisud ang kahimtang.
Lima ka basiyo sa bala ang nakuha sa mga sakop sa Scene of the Crime Operation (Soco) gikan sa crime scene.
Dugang ni Tumulak nga base sa iyang pagpangutana sa mga namuyo sa maong lugar nakadungog lang sila og lima ka buto ug wala sila makakita sa naghimo sa krimen.
Gisusi usab sa kapitan ang lawak nga gisudlan sa mga biktima diin misugat sa iyang panan-aw ang mga drug paraphernalia nga nagpasabot nga gikan migamit og illegal nga drugas ang mga biktima.
“Kita mismo nakakita nga dunay mga drug paraphernalia murag gikan sila nagsuyop didtong kuwartoha, wala pa ta kahibawo kung tungod ba kaha sa drugas or tungod ba kaha sa bahin o bayad,” matud ni Tumulak.
Miangkon si Tumulak nga walay CCTV camera nga nakamontar sa sulod sa Sitio Baskio apan naay pribado nga CCTV sa gawas nga posibling makita ang dagway sa suspek nga tungod ani makig-alayon sila sa mga tag-iya niini.
Una nang gipatawag sa Barangay Basak Pardo silang Tope ug Jenny nga dili mosulod sa ilang barangay human mailhi nga mga drug personality sa Barangay Quiot.
Sila matud pa ang runner sa illegal nga drugas ug gireklamo na usab matud pa kini nga gidagan ang kwarta sa mopalit og shabu nga tungod ani giawhag nani nga dili mosulod sa maong barangay.
Nadakpan na kaniadto ang duha sa lain-lain nga kaso apan human nga nakagawas nagpadayon sa ilang illegal nga kalihukan. / AYB / GPL