Nialegar ang usa ka mag-uuma nga gipapriso siya sa iyang bayaw nga babaye sa kasong arson, apan nangangkon nga ‘tungod kini sa iyang kagwapo.’
Si Manolito Gabunada, 36, taga Upper Lucimba, Barangay Poblacion Pardo, dakbayan sa Sugbo gipadakop niadtong Sabado alas 3 sa hapon, Abril 20, 2024, sa ilang panimalay.
Matod ni Gabunada, kinsa nahinabi sa Superbalita Cebu, nga gihimo-himoan lang siya’g sala sa iyang bayaw nga si “Karla” (dili tinuod ngan).
Matod niya nga gikontrahan siya ni Karla ug bisan unsa na lang ang pasangil niini batok kaniya.
Siya nipasangil nga kaduha na kahigayon siya gipapriso ni Karla tungod sa samang akusasyon ug nabilanggo sa Cebu City Jail sulod sa siyam ka bulan sa milabay’ng tuig.
Matod niya nga nagsugod ang dili maayong relasyon nila human wala siya nisakay sa gusto niini.
“Naa pay daghan gwapo diha, nganong ako man gyud?,” matod ni Manolito.
Gusto sa iyang bayaw nga makig-close niya og maayo kaniya pero naglikay siya kay asawa kini sa iyang igsuon.
“Natingala ko kay natulog ko naabot akong manghod uban sa bayaw ug tanod,” asoy niya. “Gipatiran ko sa walay igong rason, gikulata.”
SUWAY OG SUNOG
Nagpakurasyon siya sa Cebu City Medical Center (CCMC) sa iyang mga bun-og, apan pag-uli niya sa ilang balay, alas 3 sa hapon sa naasoy nga adlaw, gipadakop siya sa reklamo’ng pagsuway og sunog sa balay.
Gipasabot niya nga kon gisunog pa niya, mismo’ng mga silingan modakop kaniya.
Si FO2 Mary Grace Ambayan, sa Parian Fire Station Arson Investigation Unit nga nahinabi sa Superbalita Cebu, niingon nga Lunes sa buntag, Abril 22, ilang napasakaan og kasong arson ang suspek.
Wala nila makuha ang lighter nga giingong giduslit sa bongbong nga amakan sa ilang balay.
Ang suspek, dihang ilang giimbestigar, matod ni Ambayan, nihimakak sa akusasyon.
Apan naa silay video ug picture sa bongbong nga nasunog kay giingong iyang giduslitan.
Ang lawak sa second floor nga nasunog dunay gidak-on nga usa ka metro kwadrado.
‘Naghagishagis daw ni sa ilaha, sumala sa igsuon. Unya nagsige’g dokdok sa bongbong, giduslitan niya’g lighter,” matod ni Ambayan.
Wala nakadako ang kayo kay nadali’g tabang sa mga igsuon.
Matod pa, ikaduha na kining higayon nga gisunog sa suspek ilang panimalay.
Sumala sa pamilya ngadto sa kapulisan, una niadtong 2022 diin giingong sama sa lango o high sa illegal drugs ang suspek. / GPL