Nagduda ang kabanay sa 36-anyos nga babaye nga namatay sa sunog niadtong Dominggo sa gabii, Marso 31, 2024, nga siya gipatay sa wa pa ang pagkasunog sa komon nga balay sa kapuyo niini.
Sa unang migawas nga taho, gituohan nga na-trap sa balay ang biktima nga si Leonida Agbon Hambalos, kinsa nahinanok sa pagkatulog sa dihang miulbo ang sunog.
Kini nahitabo sa bukirang barangay sa Tubod-Dugoan, lungsod sa Dumanjug, habagatang-kasadpan sa lalawigan sa Sugbo.
Si Elvira Bermejo, inahan sa kapuyo ni Hambalos, nibutyag sa dihang nahinabi sa Superbalita Cebu nga sila nagduda nga gipatay ang biktima pinaagi sa pagdunggab.
Apan gipaubos pa sa autopsy ang lawas ni Hambalos aron masuta kon aduna bay foul play ang kamatayon niini.
Ang resulta sa autopsy masayran pa sunod semana.
NAKADAWAT OG ALOTE
Matod pa ni Bermejo nga pipila ka oras sa wala pa ang insidente, ang biktima bag-uhay lang ni-claim og P21,000 sa money remittance center nga gipadala sa iyang kapuyo nga nagtrabaho sa Japan.
Si Bermejo gitunolan pa og P4,000 nga bahin sa alote gikan sa iyang anak nga Overseas Filipino Worker (OFW).
Samtang si Dumanjug Fire Marshal SF04 Guiller Pegarido nagduda sab nga patay nang daan ang biktima tungod sa iyang posisyon nga napalgang nagkulob ra sa higdaanan.
Nipasabot si Pegarido nga imposible nga wa nakamata si Hambalos sa dihang nagdilaab ang kayo ug maningkamot nga makagawas sa lawak nga gikatulgan ingon man makapangayo og panabang sa mga silingan.
Giklaro sa opisyal nga padayon pa ang ilang imbestigasyon sa hitabo ingon man ang konpirmasyon base unya sa resulta sa autopsy report.
Nanghinaot ang kabanay sa biktima nga mahatagan og hustisya ang kamatayon ni Hambalos.