Gipatay sa namato sa ilang balay

Cebu City map.
Cebu City map.

Gipusil-patay ang usa ka 26 anyos nga ulitawo nga nigawas sa ilang balay kay dunay namato sa Sityo Manol, Barangay Tisa, siyudad sa Sugbo, alas 12:30 sa kaadlawon sa Lunes, Enero 29, 2024.

Ang biktima giila nga si Edward Rosales Young, samtang ang wala pa mailhi ang mamumuno nga usa ka lalaki.

Sa pakisusi sa Superbalita Cebu nasayran nga ang pagpamusil girespundihan sa Labangon Police Station sa Cebu City Police Office (CCPO) nga gipangulohan sa ilang hepe nga si Police Maj. Eraño Regidor, apan wa na nila maabti ang mamumuno.

Samtang ang mga medical personnel sa ambulance Alpha 801 mao ang nideklarar sa biktima nga patay na.

Ang Scene of the Crime Operations (Soco 7) nga niproseso sa crime scene nakakuha og duha ka mga kabhang sa wa pa matino nga kalibre sa armas.

Sa imbestigasyon sa kapulisan nasuta pinaagi sa asoy sa inahan sa biktima nga si Analyn nga ang iyang anak, alas 11:20 sa gabii sa Dominggo, Enero 28, 2024, nisulti kaniya nga may nagbato sa nataran sa ilang balay.

Iyang nakita ang usa ka wa mailhing tawo nga naglakawlakaw sa gawas.

Matod pa, pagka alas 12:00 sa tungang gabii, naa gihapon ang wa mailhing lalaki hinungdan nga ang biktima nananghid sa iyang inahan nga iyang gawason ug susihon kinsa ang maong tawo.

Sa dihang nigawas ang biktima sa ilang balay, ang inahan nakadungog og mga buto sa pusil.

Nakita sa inahan ang iyang anak nga nahagba sa ilang agianan ug patay na.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph