Gipusil-patay ang usa ka 32-anyos nga ex-convict human gisulod sa iyang panimalay sa mga armadong lalaki sa ala 1:00 sa kaadlawon, Lunes, Hunyo 23, 2025, sa Sitio Lower Kawayan, Barangay Sambag 2, Dakbayan sa Sugbo.
Ang biktima giila nga si Macgied Villamala, usa ka ‘single dad’ ug bag-ohay pa nga nakagawas sa bilangguan gumikan sa kaso nga pagkalambigit sa ilegal nga drugas.
Sa inisyal nga imbestigasyon sa kapulisan sa Abellana, gisulod sa iyang balay si Villamala samtang natulog ug giingong unom ka mga armadong lalaki nga nagtaptap sa ilang mga nawong.
Nadunggan pa nga naglalis ang biktima sa usa sa mga lalaki human nga nadunggan sa silingan nga naghisgot og shabu.
Apan dihang gipangutana ang biktima sa mga armadong lalaki kabahin sa druga giingong nitubag kini nga wala siya niini, ilabi na nga bag-o lang siya nakagawas sa bilangguan.
Dihang namugos ang mga mamumuno nga ipagawas ang ilang gipangayo, nangayo og tabang ang biktima nga nisinggit nga manawag og polis.
Sa maong sitwasyon, napugos ang armadong lalaki sa pagpusil ni Villamala.
Sa pagrespondi sa kapulisan sa maong dapit, gidala na sa tambalanan ang biktima ug nakasibat na sab ang maong mga lalaki. Samtang si Police Lieutenant Colonel Maria Theresa Macatangay, deputy city director for operation sa Cebu City Police Office (CCPO), nagkanayon nga base sa ilang nakuhang impormasyon aduna silay giila nga person of interest ug ilegal nga drugas ang gitan-aw nga motibo sa krimen.
Sa laing bahin, ang CCPO aduna nay gidudahang responsable sa nahitabong pagpusil sa usa ka ex-convict sa dalan Carlock, eskina B. Aranas, Barangay San Nicolas Proper sa Domingo sa buntag, Hunyo 22, 2025.
Ang biktima nga si Ronnie Aya-ay Lawas, 33, taga Peace Valley, Barangay Lahug apan kasamtangan nga nagpuyo sa Sitio Kastilaan, Barangay Ermita, Dakbayan sa Sugbo gipusil sa riding in tandem maka duha ka higayon.
Si Lawas giingong bag-o lang nga nakagawas sa Abuyog Penal Farm sa Abuyog, Probinsiya sa Leyte human niya mahuman ang sentensya sa kasong murder ug illegal possession of firearms.
“Part na sa Angulo nga atong gi-check if naa bay relation ang iyang pagbuhat sa krimen sa iyahang previous nga case, but this is just one the angles but most naa man sad gihapoy kalambigitan sa pag conduct nato og background investigation dili gyud mahilayo sa illegal drugs nga mga transactions,” matod ni Macatangay.
Naa nay mga kopya sa CCTV camera ang mga imbestigador sa Abellana ug Sawang Calero Police Station nga maghatag nila og giya sa pag-ila sa mga mamumuno. / dugang taho ni AYB