Gipatay tungod sa ‘problema sa druga’

PATAY: Nagligdas nga patay na si Josefino Limbaga Baldaveno, 32, mag-uuma human gipusil sa Upper, Brgy. Caliongan, lungsod sa Dalaguete, alas 11 sa buntag sa Miyerkules, Enero 17, 2024.
PATAY: Nagligdas nga patay na si Josefino Limbaga Baldaveno, 32, mag-uuma human gipusil sa Upper, Brgy. Caliongan, lungsod sa Dalaguete, alas 11 sa buntag sa Miyerkules, Enero 17, 2024. TAMPO SA DALAGUETE POLICE

Usa ka mag-uuma gipusil-patay sa wa mailhing mamumuno sa Upper, Barangay Caliongan, bukirang dapit sa lungsod sa Dalaguete, alas 11 sa buntag sa Miyerkules, Enero 17, 2024.

Ang biktima mao si Josefino Limbaga Baldaveno, 32 , ulitawo, nagpuyo sa naasoy nga dapit.

Gisubay karon sa kapulisan sa Dalaguete Municipal Police Station ang motibo sa krimen nga negosyo sa ilegal nga drugas.

Sa imbestigasyon sa kapuli­san sa Dalaguete ubos sa kamandoan sa ilang hepe nga si Police Maj. Clemente Ceralde Jr., ang inahan sa biktima niasoy nga dunay nisangpit sa iyang anak nga usa ka lalaki nga nagsakay og motorsiklo ug giadto sa iyang anak.

Ang balay nahimutang sa nabungtod nga bahin sa ibabaw sa karsada.

Nigawas sa ilang balay ug ni­dulhog ngadto sa karsada ang iyang anak apan, matod pa sa ina­han, mao nay iyang nadungog ang mga buto sa armas de fuego.

Sa iyang paglantaw sa karsada, ang iyang anak nagligdas na ug ang mga mamumuno daling nisibat sakay sa usa ka motorsiklo.

Ang biktima gisuwayan sa pagtabang sa mga rescuer sa Dalaguete ug gidala sa Alcantara Memorial Hospital apan gideklarar sa doktor nga dead on arrival (DOA).

Ang biktima dunay samad pinusilan sa ulo ug ubang bahin sa lawas.

Asoy sa inahan ngadto sa kapulisan nga ang iyang anak nalambigit sa pagpamaligya og shabu.

Iya na kining gibadlong apan wa gyud mopatuo.

Ang kapulisan sa Dalaguete nagpadayon pa sa imbestigasyon aron mailhan ang mamumuno ug pagklaro sa motibo sa pagpatay.

Nakuha sa crime scene ang tulo ka mga kabhang sa kalibre .45 nga pistola ug usa ka deformed slug ug ang kuwarta nga diha sa kilid sa biktima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph