Naka-heightened alert status ang Philippine Coastguard Central Visayas (PCG) 7 sa tanang stations ug sub-stations niini sugod karong adlawa, Abril 13 ngadto na sa Abril 20, 2025.
Gipahibawo ni Lieutenant Junior Grade Abel Jan Lomboy sa PCG 7 nga ila kining gihimo aron sa pagsiguro sa luwas nga pagbiyahe sa mga pasahero sa tibuok rehiyon ilabi na nga gipaabot ang pagdagsa sa mga biyahedor ning Semana Santa.
Lakip sa lakang sa PCG ang pagpamutang og Malasakit Help Desks sa mga pantalan aron matubag ang mga pangutana ug ubang panginahanglan sa mga pasahero.
Ingon man ang pag-deploy sa Quick Response Teams alang sa mga emerhensya, ug ang pagpasusi sa K9 units sa pag-inspeksyon sa mga barko sa mga ilegal nga kargamento.
Hingusgan usab sa PCG ang mga pre-departure inspection aron masiguro ang seaworthiness sa tanang molarga nga mga barko.
Nipahimangno usab si Lomboy sa mga biyahedor nga likayan ang pagdala og mga butang sama sa explosive, hinagiban ug flammable materials aron nga di matanggong kini sa pantalan.
Ang PCG mibutang usab sa numero sa tanang PCG stations ilang social media pages aron magiyahan ug matubag ang mga dugang pangutana sa mga pasahero. (ANV)