Gipusil atubangan sa asawa

Lalaki nga naglingkod- lingkod sa dalan ang gipusil alas 10:20 sa gabii, Miyerkules, Hunyo 4, 2025, sa Sitio Nivel Hills, Barangay Busay, Siyudad sa Sugbo.

Ang biktima giila nga si Joseph Pares, 42, minyo nga taga Sitio Arriola Compound, Barangay Busay.

Sa imbestigasyon sa Mabolo Police Station 4 sa Cebu City Police Office (CCPO), nasayran nga naglingkod lang ang biktima sa kilid sa dalan ug kalit lang nga naabot ang wala pa mailhing mamumuno ug dayong pusil.

Human sa pagpamusil dali nga nisibat ang namusil samtang ang biktima nisuksok ilawom sa ilang tindahan ug ang asawa niini nga nakasaksi sa hitabo dali nga nagpatabang sa barangay hall sa Busay.

Igo ang biktima sa iyang tuong bahin sa dughan sa wala matino nga kalibre sa armas ug dali siya nga gidala sa pribadong tambalanan.

Base sa nakuha nga kasayuran sa kapulisan sa Mabolo nga nadakpan na kaniadto ang biktima apan wala pa matino kon unsa nga kaso.

Nagpadayon pa karon sa ilang imbestigasyon ang kapulisan ug pagsusi kinsa ang responsabli sa krimen.

Lakip sa gikuhaan og pamahayag sa kapulisan ang asawa sa biktima kon wala ba siyay gikakontra sa wala pa ang insidente.

Personal nga atraso ang gitan-aw nga motibo sa maong pagpamusil. / AYB