Gipusil-patay sud sa iyang balay
Usa ka suspetsado nga drug pusher nga katulo na nabilanggo sa Mambaling Police Station tungod sa kaso sa gidiling drugas, gipusil-patay sud sa iyang balay sa Sityo Ipil-Ipil, Barangay Mambaling, siyudad sa Sugbo, ala 1:30 sa kaadlawon, Lunes, Enero 15, 2024.
Ang biktima nailhan nga si Lloyd Monceda, 40, ulitawo apan dunay kapuyo ug lumolupyo sa naasoy nga dapit.
Sumala sa imbestigasyon sa Mambaling Police Station ubos sa kamanduan ni Police Maj. Jonathan Bethooven Taneo, nasuta nga usa ka armadong lalaki nga nagsakay og motorsiklo ang niabot sa balay sa biktima.
Nanuktok kini sa pultahan ug nanangpit nga nagkanayon nga mopalit og shabu. Apan gitubag sa kapuyo sa biktima nga wala na.
Apan giablihan sa biktima ang pultahan ug didto na gipusil sa makatulo ka higayon. Ang wa mailhing mamumuno daling nisibat ug wa na maabti sa mga polis nga ningresonde sa alarma.
Ang biktima gitabang sa responders sa Disaster Risk Reduction Managment Office (DRRMO) apan nakabsan na sa kinabuh busa wala madala sa tambalanan.
Ang PNP Scene of the Crime Operation (Soco) nakapunit og duha ka mga kabhang sa kalibre .45 nga armas. Gitan-aw sa kapulisan nga illegal drugs ang motibo sa maong krimen.