Onsehan sa ilegal nga drugas kun wa bayri ang nakuha nga shabu ang natino nga motibo sa pagpusil patay sa usa ka lalaki sa alas 4 sa kaadlawon sa Biyernes, Hulyo 19, 2024 sa Dan Tres de Abril, Sitio Tuburan, Brgy. Punta Princesa, Dakbayan sa Sugbo.
Ang biktima giila nga si Joshua Sy, hingkod, taga Sitio Callejon, Brgy. Labangon, Dakbayan sa Sugbo apan dunay giabangang balay sa maong lugar.
Matod sa mga residente sa dapit nga gipukaw sila og buto-buto sa armas ug sa ilang paggawas ilang nakita nga nahagba ang biktima nga nabulit na sa dugo.
Apan sa wala pa ang pagpamusil giingong nag-inom pa si Sy kilid sa basketball court sa maong lugar.
Kalit lang niabot ang nag binugtong nga gunman ug dayong pusil kang Sy sa lawas.
Nakadagan pa ang biktima ug nisuot sa gagmay’ng agianan sa kabalayan bisan kon samdan.
Apan gigukod siya sa gunman ug gitiwasan sa pagpusil og unom ka higayon hinungdan sa iyang hinanali nga kamatayon.
Dali nga nisibat ang killer suot sa kabalayan ug wala na masayri kon diin paingon apan dunay nakakita sa panagway niini.
Way nakaila kang Sy sa dapit ug gituohan nga nidagan ra sa interior portion.
Ang dakong tattoo lang sa dughan nga nakasuwat sa ngan nga Joshua ang timailhan niini sa sinugdan.
Nakakuha og unom ka mga basiyo sa bala sa kalibre .45 ang mga sakop sa Scene of the Crime Operations diin pulos kini miigo sa lawas sa biktima.
Matod ni Police Major Eraño Regidor, hepe sa Labangon Police Station, nga nailhan na nila ang gunman apan nagdumili una siya sa pag tug-an kay nagpadayon pa ang ilang manhunt sa pagsuwat ning taho.
Dunay nakaila sa gunman tungod kay wala kini makatabon sa iyang nawong ug nalambigit usab kini sa ilegal nga drugas.
Drugas ang usa sa gitan-aw nga motibo sa krimen tungod kay ang biktima nalambigit sa ilegal nga drugas samtang ang killer drug personality.
Sa nakuha nga impormasyon ni Regidor nga nakautang ang biktima og dakong kantidad sa usa ka drug personality ug sa dihang gipaningil, wala mobayad.
“Nag onsehan sa singil sa illegal drugs. Ang item nga gihatag aning biktima wala ma remit niya. So, gitagaan nag adlaw nga pabayran. Wala gyud mobayad mao ning gipusil,” matod ni Regidor.
Gipapangita ni Regidor kadtong mga batan-on nga gikainom sa biktima atol sa pagpamusil sanglit sila mismo ang unang nakakita sa hitabo aron makuhaan nila og pamahayag. / AYB