Patay ang usa ka 18 anyos nga lalaki human pusila sa kanhi uyab sa iyang angkas nga babaye sa Sitio Barracks, Barangay Inayagan, siyudad sa Naga, alas 3:00 sa kaadlawon, Dominggo, Abril 14, 2024.
Ang biktima giila nga si Jasper Martinez Alegria, samtang ang suspek sa pagpamusil mao si Albert Padayao, 35. Ang suspek ug biktima pulos taga Barangay Pangdan, Naga.
Kini ang gibutyag ni P/Staff Sgt. J.A. Caballero, imbestigador sa maong kaso sa Naga City Cebu Police Station nga gikahinabi sa Superbalita Cebu sa Dominggo, Abril 14, 2024.
Sa inisyal nga imbestigasyon sa kapulisan, nasayran nga nag-inom ang biktima uban sa usa ka babaye nga ginganlan og ‘Nova Mae’ nga giingong ex girlfriend sa suspek.
Nanghagad, matod pa, ang biktima nga mamalhin sila’g lugar nga imnan didto sa lungsod sa Minglanilla.
Apan ang suspek ni-chat, matod pa kini sa higala niini, ug nangutana kon asa moadto ang iyang kanhi uyab uban sa biktima.
Samtang nagdagan na ang motorsiklo sa biktima nga angkas si Nova Mae ug pag-abot sa Inayagan, kalit lang nga dunay naghaguros nga motorsiklo nga migukod kanila ug sa paglingi sa babaye, ang iyang nakita ang kanhi uyab uban sa laing duha ka lalaki nga angkas sa motorsiklo.
Nisinggit kini nga “Naa ako, ex na uyab” ug dayong tion sa armas niini ngadto kanila.
Dali sila nga mihunong ug matod pa sa babaye nga giingnan ang biktima nga padaganon apan kalit lang kini nga gipusil nga niresulta sa iyang kamatayon.
Si Caballero nagkanayon nga selos ang motibo sa pagpamusil samtang si Nova Mae niingon dili sila uyab sa biktima.
Nakuha sa crime scene sa mga sakop sa Scene of the Crime Operatives (Soco) mao ang usa ka kabhang nga bala sa kalibre .45 nga armas.
Ang Naga City Police Station nangita sa suspek lakip na sa mga kauban niini sa gihimong krimen. / Dugang ni AYB