Gipusil sa dalaga kay ‘kakunsabo sa uyab’

Gipusil sa dalaga kay ‘kakunsabo sa uyab’
Image from Google Maps

Angol ang piyado sa usa ka fish pond sa Sitio Lower Sto. Niño, Barangay Inayawan, siyudad sa Sugbo, human gipusil sa dalaga nga uyab sa iyang barkada, alas 2 sa hapon sa Miyerkules, Oktubre 18, 2023.

Giila sa mga silingan ang biktima nga si John Veloso, 44, nagpuyo sa dapit samtang, ang suspek giila nga si Geraldyn Sanchez, alyas Baden, 25, molupyo sa samang dapit.

Sumala sa kapulisan sa Inayawan Police Station, ubos sa kamanduan sa ilang station chief nga si Police Maj. Jeciree Bacitao, si Sanchez nasuko kang Veloso kay iyang gituhoan nga maoy nagtabang og tago sa relasyon sa iyang uyab ngadto sa laing babaye nga dalhon sa ilang payag.

Matod sa biktima ngadto sa kapulisan nga samtang siya nagkaon sulod sa payag, kalit lang niabot ang suspek.

Kalit kini nga nasuko ngadto sa iyang boyfriend tungod sa pagduda nga duna kini gidala nga babaye sa ilang payag nga katulganan.

Bisan unsaon sa pagpasabot sa boyfriend nga dili kini tinuod, nisagbat si Veloso aron unta pakalmahon ang suspek.

Apan, asoy sa biktima, siya na hinuon ang gitionan sa dala nga armas ug mipasangil nga gitabunan lang niini ang iyang hinigugma ug dayong pusil makaduha ka higayon.

Si Veloso naigo sa tuong bukton ug tuong paa ug gidali sa pagdala sa Talisay City District Hospital.

Matod ni Police Senior Master Sergeant Geofrey Gutual, chief investigator sa Inayawan Police Station nga dali nga nisibat ang suspek human sa hitabo.

Iyang gibutyag atol sa interview sa Superbalita Cebu sa Huwebes, Oktubre 19, nga didto na magkatulgan ang suspek ug boyfriend, uban ni Veloso.

Kini ang hinungdan sa pagduda sa suspek nga matag gabii dunay laing babaye nga dalhon ang iyang boyfriend sa payag ug kunsabo sila ni Veloso.

Sa pagsuwat ning taho, wa pa madakpi sa kapulisan ang suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph