Gipusil sa ulo, tipi
Patay ang usa ka 26 anyos nga lalaki human pusila sa wala pa mailhi nga mamumuno, alas 12:05 sa kaadlawon, Huwebes, Marso 7, 2024, sa Andres Abellana Ext., Sitio Guadario, Barangay Guadalupe, Dakbayan sa Sugbo.
Ang biktima giila nga si Ralph Ivan Taborada Buhawe, taga Sitio Kanaas, Banawa, Barangay Guadalupe.
Sigun sa mga lumolupyo sa dapit nga buto na lang sa armas ang ilang nadunggan ug sa ilang pag gawas sa ilang balay, ilang nakit-an nga nag buy-od nga patay na ang biktima.
Dali nga niresponde ang mga sakop sa Barangay Disaster Risk Reduction and Management Office apan gi deklara kini nga wala nay kinabuhi tungod sa samad pinusilan sa ulo.
Ang kapulisan sa dakbayan sa Sugbo nagpadayon pa sa ilang imbestigasyon.
Ilang nasuta nga napriso na ang biktima sa kaso gihapon sa ilegal nga drugas.
Matod ni Police Major Paul Kenneth Albotra, hepe sa Guadalupe Police Station, nga drugas gihapon ang ilang gisubay nga motibo.
Migawas sa pakisusi nga dunay gikasabot ang biktima nga pakigkitaan sa maong lugar apan sa dihang nag-abot sila, gipusil dayon siya niini.
Nagtuo si Albotra nga managkaila ra ang biktima ug killer. / AYB