Naangol ang usa ka 39 anyos nga lalaki human pusila sa wa mailhing lalaki, pasado ala una sa kaadlawon, Lunes, Agusto 5, 2024, sa Sitio Luton, Barangay Mabini, bukirang dapit sa dakbayan sa Sugbo.
Ang biktima nga gidali pagdala sa Cebu City Medical Center (CCMC) giila nga si Ananias Portaliza Jr., residente sa maong lugar.
Matod ni Police Major Alvino Enguito, hepe sa Talamban Police Station nga samtang nagpakaon sa iyang iro, ang biktima sa gawas sa ilang balay kalit lang siya nga gipusil sa armadong tawo nga giingong nagtago sa luyo sa ilang balay.
Upat ka lanog sa buto sa armas ang nadungog sa mga residente sa dapit apan usa ra ang igo niini sa may aping.
Dali nga misibat ang suspetsado human sa pagpamusil samtang ang mga molupyo sa lugar nagtinabangay nga madala ang biktima sa tambalanan.
Usa sa gitan-aw nga motibo sa krimen mao ang personal nga atraso diin gituohan sa kapulisan sa Talamban nga kaila ra sa biktima ang responsable sa pagpamusil.
“Pagkahuman sa hitabo amo man na trace didto ang iyahang footprints nikanaog ra gyud siya didto kay kanang ilang balay gilid man na sa pangpang, lawom kaayo, didto niagi ang suspect, naglakaw ra,” matod ni Enguito.
Ang kapulisan padayon pa sa ilang imbestigasyon ug misusi kon duna bay kontra ang biktima sa wala pa ang maong pagpamusil. / AYB