Gipusil samtang naligo, patay

Gipusil samtang naligo, patay
SunStar Local News GPX

Namatay sa tambalanan ang usa ka lalaki nga gipusil samtang naligo sa gawas sa ilang balay sa Purok Aliños, Sityo Mananga 1, Barangay Tabunok, siyudad sa Talisay, alas 6:45 sa gabii sa Huwebes, Marso 14, 2024.

Ang biktima giila nga si Willian Sasareta Abadiano, 45, minyo, mangingihaw, nagpuyo sa maong dapit. Siya nakabaton og upat ka mga samad pinusilan sa dughan ug bukton.

Samtang ang suspek nailhan nga si Warren Sabanal, 30, ulitawo, taga Mananga 1, Brgy. Tabunok.

Sa imbestigasyon sa kapulisan sa Talisay ubos sa kamanduan ni Police Lt. Col. Magbanua, asoy sa igsuong babaye sa biktima, nga nakadungog siya og upat ka mga boto sa pusil.

Sa iyang pagsusi, ang iyang maguwang nga naligo maoy gipusil hinungdan nga ilang gidali sa pagdala sa Cebu South Medical Center, apan alas 7:45 sa gabii sa samang adlaw, ang biktima gideklarar sa nag-atiman nga doktor nga patay na.

May nakasaksi nga silingan sa pagpusil sa biktima busa nailhan ang suspek, kinsa daling nisibat human sa pagpamusil.

Wa pa madakpi ang suspek atol ning pagsuwat ug wa pa sab maestabilisar ang motibo sa pagpusil.

Kasong murder ang ipasaka sa kapulisan batok kang Sabanal. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph