Nalandig sa tambalanan ang usa ka 26 anyos nga lalaki human pusila makaduha ka higayon sa tiyan sa Sityo Upper, Barangay Carreta, siyudad sa Sugbo, pasado alas 4 sa kaadlawon sa Miyerkules, Abril 24, 2024.
Ang biktima giila nga si Raymond Ruiz, usa ka pintor, lumolupyo ra usab sa maong lugar.
Ang gitudlo nga nipusil kaniya mao usab ang iyang kaila nga si Roy-Roy Mojada, nga wa pa madakpi sa Mabolo Police Station atol ning pagsuwat.
Sigon sa saksi, ang biktima ug suspek nag-estoryahanay pa apan pipila ka gutlo, nabati ang duha ka buto sa armas.
Samad sa tiyan ang naangkon ni Ruiz gamit ang wala pa matino nga kalibre sa armas dayon gidala sa usa ka tambalanan.
DUMOT
Sa imbestigasyon sa Mabolo Police Station nasuta nga nasuko, matod pa, ang suspek sa biktima sanglit niadtong mga bata pa sila, nadakpan sila ug nasulod sa Operation Second Chance (OSC) sa Siyudad sa Sugbo.
Matod pa, bisan naa sila sa sulod sa OSC, permi na sila nga mag away.
Giingong nibahad ang suspek sa biktima nga kon magkita sila pag-usab, dunay mahitabo niini.
Tuod man, nag-abot sila sa usa ka lugar sa Carreta diin didto nahitabo ang pagpamusil.
Ang biktima dunay kasong pagpangawat niadto hinungdan nga nadala sa OSC, samtang ang suspek nalambigit sa illegal nga drugas ug lain pang krimen dihang sila mga menor pa. / AYB