Gireklamo sa managtiayon ang opisyal sa Barangay Paz, Lungsod sa Poro, Camotes Island, Sugbo ug mga pribadong indibidwal tungod sa pasangil nga illegal quarrying sa ilang yuta.
Sa usa ka dokumento nga gipadala sa SunStar Cebu niadtong Lunes, Marso 10, 2025, ang magtiayon nga si Mario ug Sheila Suson nga nagpuyo sa Estados Unidos, nagpasaka og reklamo sa Seventh Judicial Region’s Municipal Circuit Trial Court nga nagpasangil kang Konsehal Dervin Yuzon ug sa magtiayon nga si Roy ug Janet Garciano sa pagkuha og mga bato gikan sa ilang tulo ka ektaryang yuta nga wala’y permiso sa Barangay Paz.
Lakip usab sa mga gireklamo ang Mayor sa Poro nga si Edgar Rama, ang Provincial Environmental Officer nga si Rodel Bontuyan, ug ang Municipal Environmental Officer nga si Ramil Labana tungod sa ilang pagkapakyas sa pagbadlong sa maong kalihukan.
Sumala sa reklamo, ang pagmina nakamugna og dako nga kadaot sa yuta nga nagbilin og lawom nga lungag ug pagpangamatay sa mga tanom.
Gipadayag sa mga Suson nga ilang gipalit ang yuta aron tukoran og balay sa ila unya nga pagretiro apan dili na mapuy-an tungod sa pag-quarry.
Nahibulong ang magtiayong Suson nga gitugotan sa mga lokal nga opisyal ang pag-quarry nga wala’y permiso, ug ang gipanguha nga mga bato gigamit sa mga proyekto sa munisipyo.
Ang mga ekipo sa gobiyerno nakita usab nga nagdala og mga materyales gikan sa lugar.
Nasayran ni Mario Suson ang pag-quarry sa ilang yuta niadtong Agusto 2024 pinaagi sa usa ka residente nga nabalaka.
Sa pagsusi sa lugar niadtong Septyembre 2024, nakit-an ni Mario ang usa ka dalan nga wala masemento paingon sa lugar nga dunay dako nga lungag tungod sa pagmina.
Ang mga trabahante sa maong lugar nagkumpirmar nga si Yuzon ug ang mga Garciano ang nagdumala sa operasyon.
Bisan pa sa balikbalik nga mga pasidaan ni Suson, ang pagmina nagpadayon.
Niadtong Pebrero 2025, gibisita pag-usab ni Suson ang yuta ug nakita nga mas nanagko pa ang mga lungag. / JPS