Daling gidala sa tambalanan ang usa ka 31-anyos nga e-bike driver human siya gidunggab og barbecue stick sa makadaghang higayon sa iyang gikalalis, alas 7:00 pasado sa gabii, Abril 12,2025, sa may Avocado St., Barangay Mambaling, Dakbayan sa Sugbo.
Ang biktima nga nakaangkon og daghang samad-dinunggaban mao si Darwin Jabonero nga residente sa Ma. Gotchan St. sa nahisgutang barangay samtang ang suspek nga si Jai Michael Cruz, 36, gitanggong sa Mambaling Police Station.
Sa imbestigasyon sa kapulisan, nisaysay ang suspek nga iyang gipaabangan ang traysikad ngadto sanglit naluoy siya ug para mapadayon pud sa biktima iyang panginabuhi isip drayber ug tiglabay og basura.
Matod ni Cruz nga iyang giingnan ang biktima niadtong Sabado nga og dili kini kahatag sa abang sa traysikad, iya kining bawion apan nasuko ang biktima dihang gipaningil.
Dugang sa suspek nga dihang padulong na unta siyang muuli sa ilaha, giatngan siya sa biktima ug gayawyaw.
Gisuwayan siya og sumbag sa biktima apan iyang gilayog ug dihang nakakita og barbecue stick, iya kini'ng gidunggab sa makadaghang higayon.
Dihang nakadawat og tawag ang kapulisan sa Mambaling gikan sa usa ka concern citizen nga nagpahibawo sa maong panghitabo, gihimo dayon ang hot pursuit uban sa abag sa mga tanod ug malampusong nadakpan ang suspek.
Gibalhog na sa Mambaling Police Station ang suspek nga posibleng mag-atubang og kasong frustrated homicide samtang ang biktima anaa na sa luwas nga kahimtang. / JDG