Nasikop sa buy-bust ang usa ka construction worker nga giingong nangumpra og shabu niadtong Miyerkules sa gabii, Agusto 14, 2024 sa Sityo Bato, Barangay Ermita, Siyudad sa Sugbo.
Ang Station Drugs Enforcement Unit sa kapulisan sa Carbon Police Station 5, Siyudad sa Sugbo ubos sa pagdumala ni PMAJ Philip John Libres, inabagan sa Philippine Drug Enforcement Agency (PDEA-7) ang nipahigayon og buy-bust sa suspek nga giila sa kapulisan nga si 'Christian', 27, minyo, taga Sityo Pandong Bato, Brgy. Media Once, Siyudad sa Toledo apan nagtrabaho sa dakbayan sa Mandaue.
Ang suspek wa makamatikod nga polis nga nagpaka aron-ingnon nga buyer ang mipalit kaniya og usa ka pakete sa shabu bugti sa P200.
Apan nasuta nga aduna pay laing 11 ka pakete nga adunay sud nga gituhoang shabu ang nakuha gikan kaniya.
Matod sa suspek nga gisugo siya sa iyang mga kauban sa trabaho sa pagpangumpra og shabu sa Bato Ermita alang sa ilang konsumo. / DVG