Usa ka lalaki nga nagbiseklita ang nabanggaan sa usa ka awto nga Suzuki Swift hatchback sa dalan M.J. Cuenco Avenue eskina sa General Maxilom Ave., Barangay Carreta, dakbayan sa Sugbo, alas 11:40 sa buntag, Sabado, Abril 13, 2024.
Ang biktima nga maoy nagmaneho sa biseklita giila nga si Alex Ochia Malubay, 44, drayber og taxi, ug taga dan Alumnos, Brgy. Basak Pardo, dakbayan sa Sugbo.
Sa imbestigasyon sa Traffic Enforcement Unit sa Cebu City Police Office (CCPO), nasuta nga samtang nagsubay ang biktima sa M.J. Cuenco paingon kini liko sa Gen. Maxilom apan kalit nga nidumbol sa iyang likod ang awto nga gimaneho ni Casey John Rabago Navarro, 24, tag-iya og construction company nga taga Lawaan 1, dakbayan sa Talisay.
Ang insidente nakuha sa CCTV camera nga gipanag-iya sa kagamhanan sa dakbayan sa Sugbo diin makita ang pagkalagpot sa biktima.
Daling gidala ang biktima sa Cebu City Medical Center (CCMC) diin nakaangkon og angol sa wang bahin sa paa ug tuong bukton niini.
Nisunod usab dayon ang driver sa auto ngadto sa tambalanan ug misaad nga siya ang moabaga sa tanang gasto.
Wala na mopasaka og kaso ang biktima subay sa gisaad ni Navarro nga kini ang mogasto sa tanang gastoanan sa tambalanan. / AYB