Gisuspenso ang operasyon sa chartered flights gikan Cebu paingon sa Bantayan hangtod adunay dugang pahibalo, pipila ka bulan human gilusad ang rota, kansang tuyo mao ang pagpamubo sa oras sa biyahe tali sa duha ka mga destinasyon.
Ang King Aces Travel and Tours Service Inc. (Kattsi), sa ilang pahibalo niadtong Sabado, Mayo 3, 2025, wala mohatag og dugang detalye sa hinungdan sa suspensyon o kon mobalik ba ang serbisyo sa umaabot.
“We regret that we can no longer service our clients for this route,” pamahayag sa Kattsi.
“For assistance with alternative travel arrangements or further inquiries, please don’t hesitate to contact us - we’re here to help you reach your destination.”
Niadtong Agusto 24, 2024, gilusad sa Kattsi ang regular nga chartered flights tali sa Mactan-Cebu International Airport sa dakbayan sa Lapu-Lapu ug Bantayan Island Airport.
Ang maong serbisyo gilauman nga mopamubo ngadto sa upat hangtod lima ka mga oras nga biyahe pinaagi sa yuta ug dagat gikan sa Cebu City paingon sa lungsod sa Santa Fe sa Bantayan Island ngadto na lang sa 30 ka minutos pinaagi sa eroplano. / EHP