NAPISOK ang mata ug nihuboy ang nawong sa usa ka construction worker human gitabangan sa pagkulata alas 3:00 sa kaadlawon sa Dominggo, Hunyo 22, 2025, sa Barangay San Isidro, Lungsod sa San Fernando.
Si Jemar Caburnay Tapian, 18, ulitawo usa ka construction worker, taga Sitio Libo, Barangay Tanañas, San Fernando, nalandig sa tambalanan human naputos sa mga bun-og ang nagkadaiyang parte sa kalawasan.
Nadakpan sila si Ahljie Abellana Sebial, 22, si Ace Vincent Tañan Sasam, 19, ulitawo, ug Froilan Suico Paradero,18, ulitawo, grade 9 student, pulos taga Barangay San Isidro, San Fernando. Samtang at-large si alias “Pot-pot” ug ang daghang John Does. Na-rescue sab sa kapulisan ang 17-anyos.
Sa imbestigasyon sa kapulisan ang biktima gikan sa disco sa fiesta sa nahisgutang lugar.
Padulong na siya mopauli sakay sa motorsiklo apan kalit nga niabot ang mga suspek ug gibunlot ang biktima sa walay igong rason ug gitabangan sa pagkulata. Sa kadaghang bun-og sa nagkadaiyang bahin sa lawas sa biktima, naglisod na kini og buka sa iyang mata.
Giingong gisuyaan ang biktima sa ubang batan-ong nag-disco. / GPL