PATAY ang 78-anyos nga lolo human tigbasa sa iyang silingan nga 67-anyos samtang nagtan-aw sa away ni Manny Pacquiao sa Purok 2, Barangay Cansiwang, Lungsod sa Guindulman, Probinsiya sa Bohol sa alas 2 sa hapon, Dominggo, Hulyo 20, 2025.
Ang biktima nga nakabsan sa kinabuhi giila nga si Angelo Omapas, nagpuyo sa maong lugar.
Ang gitudlo nga responsable sa krimen mao ra usab ang iyang silingan nga si Samuel Balaba, 67, usa ka mag-uuma.
Giingon nga aduna nay daan nga panagbangi ang duroha.
Sa imbestigasyon sa Guindulman Municipal Police Station nga samtang nagtagay ang biktima ug ang suspek nga nagtan-aw sa away ni Pacquiao, nitumaw ang ilang panaglalis sa wala matino nga hinungdan.
Giingong adunay dala nga sanggot ang suspek sanglit usa man kini ka mag-uuma ug samtang naa na sa ikaduhang round ang away ni Manny Pacquiao ug Mario Barrios, natingala na lang ang mga kauban nga nanan-aw sa TV nga nagdumog na ang duha sa luyo.
Kalit lang nga nikuha sa iyang sanggot ang suspek ug gitigbas ang biktima sa nagkalain-laing bahin sa lawas.
Dali nga nanawag og polis ang mga residente ug sa ilang pag-abot nagbuy-od na ang biktima nga naligo na sa iyang kaugalingong dugo.
Sa paghiling sa lawas niini, girekomendar ni Dr. Louie Bersabal nga dalhon sa Rural Health Unit sa Guindulman apan patay na kining nahiabot.
Nilusad og hot pursuit operation ang kapulisan sa Lungsod sa Guindulman ug nadakpan ang suspek sa iyang balay.
Gihikay na ang kasong Homicide batok sa suspek nga niangkon sa salaud nga iyang nabuhat. / AYB