Giamendar sa kapulisan ngadto sa kasong murder ang unang kaso nga frustrated murder nga gipasaka sa Cebu City Prosecutor’s Office batok kang Jed Andrew Salera, alyas Range 999, suspek sa pagpusil sa usa ka langyaw.
Matod ni Police Major Romeo Caacoy, hepe sa Mabolo Police Station, nga unang gidala ang biktima nga si Michael George Richey, 37, American national, sa Cebu City Medical Center niadtong Dominggo sa buntag, Marso 17, 2024.
Apan nianang pagkahapon, gibalhin siya sa pribadong tambalanan ug didto na mabugto-i sa kinabuhi pasado alas 4:00 sa hapon sa Martes, Marso 19, 2024.
“Gahapon, Sir, na file man to nato ang kasong frustrated murder. Ato nang napada didto sa piskaliya nya nahitabo nga namatay ang biktima so gi amend na namo ganina unya naghuwat na lang mi sa inquest sa atoang prosecutor,” matod ni Caacoy.
Hugot nga gihimakak ni Caacoy ang pasangil sa abogado sa suspek nga nakalapas sila sa reglamentary period.
Ang abogado ni Range 999 miadto sa Mabolo Police Station ug nidemanda nga buhian sa labing dali nga panahon ang iyang kliyente sanglit milapas na sa oras ang pagtanggong kaniya nga way kaso nga gisang-at.
Samtang, dugang ni Caacoy, nga nailhan na usab nila kadtong lalaki nga nipatid kang Richey sa luyo niini nga nakita sa CCTV apan iyang gibutyag nga giuna lang una nila ang pagpasaka og kaso batok kang Range 999. / AYB