Nagpadala si United States President Donald Trump ngadto sa Iran og usa ka giusab nga bersyon sa gisugyot nga peace framework nga nagdala og mas estrikto nga mga kondisyon taliwala sa nagpadayong mga paningkamot nga makab-ot ang usa ka kasabotan nga motapos sa gubat, matod sa report sa US media niadtong Sabado, Mayo 30, 2026.
Gipahayag sa The New York Times nga giamendahan ni Trump ang pipila ka bahin sa draft agreement ug gibalik kini ngadto sa Tehran aron tun-an, subay sa impormasyon gikan sa tulo ka mga opisyal nga nasayod sa maong butang. Wala hinuon gidetalye sa report kon unsa ang mga eksaktong kausaban nga gihimo sa dokumento.
Matod sa mga opisyal, nagpadayag si Trump og kabalaka kalabot sa mga probisyon nga posibleng maglambigit sa pag-unfreeze o pagbuhi sa mga Iranian assets—usa ka isyu nga una na niyang gisaway kaniadto kalabot sa 2015 nuclear deal nga gipakig-istoryahan ubos sa administrasyon ni kanhi Presidente Barack Obama.
Gisaysay usab sa report nga nairita na si Trump sa kahinay sa tubag sa Iran sa mga sugyot sa US, nga giagi pa sa mga tigpatigbabaw o intermediaries, lakip na ang mga opisyal gikan sa Pakistan.
Usa ka opisyal ang nipadayag sa mantalaan nga ang maong giusab nga sugyot nagtumong sa pagpataas sa presyur ngadto sa Tehran ug pag-aghat kanila nga dawaton ang framework nga una nang giduso ngadto kang Iranian Supreme Leader Mojtaba Khamenei alang sa pag-aproba.
Bisan pa niini, namatikdan sa report nga nagpabiling lisod ang komunikasyon ngadto sa kinatas-ang liderato sa Iran, hinungdan nga duna gihapoy posibilidad sa dugang mga kalangan kon duna pay mga dugang kausaban nga himoon sa maong dokumento, nga gihulagway isip usa ka memorandum of understanding (MOU).
Ang mas mga dako ug init nga isyu, lakip na ang kaugmaon sa nuclear program sa Iran, pagatubagon na unya sa mosunod nga mga hugna sa negosasyon, sumala sa report.
Gi-report usab sa news website nga Axios, nga nagkutlo og duha ka opisyal sa US, nga naglaum gihapon si Trump nga mapinalisar sa dili madugay ang kasabutan apan nangita lang kini og mas lig-on nga mga probisyon sa mga isyu nga giisip niyang dinalian, ilabi na kadtong naglambigit sa nuclear material sa Iran.
Nagpahigayon si Trump og duha ka oras nga tigom niadtong Biyernes uban sa iyang mga senior advisers didto sa White House Situation Room aron hisgutan ang mga paningkamot sa pagtapos sa gubat, apan walay opisyal nga pamahayag nga giluwatan ngadto sa publiko human sa maong panag-istorya. / Gikan sa wires
