Gisusi karon sa mga opisyal sa panglawas ang posible'ng kaso sa Glanders disease sa Lalawigan sa Siquijor.
Ang Glanders disease, talagsaong balatian nga zoonotic, usa ka bacterial infection nga motakboy sa kahayupan sama sa kabayo, donkeys, ug mule. Mahimo sab kini nga motakboy sa tawo.
Si Department of Health (DOH) Negros Island Region (NIR) Director Razel Nikka Hao, sa usa ka pamahayag ngadto sa media, nagkanayon nga padayong pa nga gi-validate ang test results.
Matod ni Hao nga ang DOH padayon nga nakigtambayayong sa Department of Agriculture ug sa local government units sa Siquijor aron kapugngan ang pagkatap sa sakit ngadto sa mga mananap.
Ang Siquijor Provincial Health Office (SPHO) sa mensahe nga gipadangat sa SunStar Cebu sa Lunes, nagkanayon nga padayon pang gihimo ang imbestigasyon.
Matod sa SPHO nga nagpaabot pa sila sa unang batch sa samples nga gisumiter sa testing.
“These cases are treatable with early detection and available treatment,” matod ni Hao.
Gipahinumdoman niya ang publiko nga dili mokaon o moduol sa mga nagmasakiton nga mga mananap.
Matod ni Hao nga kon dunay namatikdan nga mananap nga nasakit, kinahanglan nga i-report dayon kini sa veterinary office.
Sa iyang bahin, si Gobernador Jake Villa nikumpirmar sa presinsya sa kaso sa zoonotic disease sa lalawigan.
Sa iyang Facebook post, si Villa niawhag sa publiko nga magmabinantayon ilabi na sa mga expose kaayo nga mga mana-nap sama sa kanding, kabaw, ug ubang domestic animals.
“Ang probinsya sa Siquijor aduna nay confirmed cases sa sakit nga zoonotic disease nga gikan sa masakiton nga hayop ug posibleng motakod sa tawo,” kabahin sa post ni Villa.
Sumala sa New York State Department of Health, ang timailhan sa mga tawo nga may glanders hilantan, pagpanakit ug pagpanghugot sa kaunoran, labad sa ulo, huot ang dughan ug uban pa. / JJL