Nagpaabot si Bise Gobernador Glenn Soco nga lakbitan sa State of the Nation’s Address (Sona) 2025 ni Presidente Ferdinand Marcos Jr. ang pag-regulate sa online gambling ug naghatag og updates sa mga importanteng proyektong pang-imprastraktura sa Sugbo sama sa ikaupat nga tulay ug Metro Cebu Expressway.
“Yes, I think there has to be more regulation sa atong online platform and that is, I think, one of the legislative priorities that we will undertake,” matod ni Soco.
Matod niya nga ang Cebu Provincial Board nakapasar na og duha ka resolusyon kalabot sa mga online nga kalihukan, timailhan sa kabalaka bahin sa maong isyu sa lokal nga lebel.
Nagkanayon si Soco nga ang online gambling usa ka isyu nga dili lang gobiyerno nasyonal ang nagtubag, apan apil usab ang mga lokal nga awtoridad.
Nagkanayon sab si Soco nga nagpaabot sab nga hisgutan ang dugang mga proyekto nga specific sa Sugbo, ilabi na ang mga update sa dagkong kalambuan sa imprastraktura.
Giila ni Soco ang panawagan sa Presidente alang sa panaghiusa sa sinugdanan sa iyang pakigpulong apan gitan-aw kini isip pagpakita sa kasamtangang pagkabahinbahin sa nasod.
“I wish that the President can unite the country and make it a concerted effort to unite all sectors and political colors,” iyang gidugang.
Gihangop sab niya ang suporta sa administrasyon alang sa micro, small, and medium enterprises (MSMEs), ingon man ang mga paningkamot sa pagdani sa langyaw nga mga pamuhunan.
Gidayeg niya ang pasundayag sa ekonomiya sa Pilipinas nga namatikdan ang kasamtangan niini nga ranggo isip ikaupat sa mga nasod sa ASEAN. / CDF