Gob. Garcia milugway sa loan application sa residente sa 93-1

Gob. Garcia milugway sa loan application sa residente sa 93-1
Cebu Governor Gwendolyn Garcia.File photo

Ang 44-homeowner association, nga nagpuyo sa 93-1 nga lote, gilugwayan og laing usa ka bulan aron makompleto ang tanang gikinahanglang mga dokumento alang sa ilang Pag-ibig loan application.

Sa tigom sa Huwebes, Hulyo 4, 2024, uban sa mga nagpuyo sa 93-1 nga lote nga nahimutang sa Cebu City, si Cebu Governor Gwendolyn Garcia nidugang og laing lugway ngadto sa Agusto 8, 2024, human sa pagka-expire sa iyang Hulyo 2 nga deadline nga gitakda niadtong Mayo 2024.

“Unsa ang among gipaabot? Anang adlawa ang Pag-ibig na mo report kon kinsa tung nag submit nga complete,” matod ni Garcia.

Alang niadtong walay kompleto nga mga dokumento, gihimug-atan ni Garcia nga adunay posibilidad nga pahamtangan og silot ang nalangan nga aplikasyon.

Mga di kompletong dokumento, lakip na ang tax clearance, aprubadong subdivision plan ug uban pa gituki atol sa tigom nga gitambungan usab ni Acting Cebu City Mayor Raymond Alvin Garcia.

Kini nga mga dokumento gikinahanglan aron makakuha og barato nga financing loan sa Pag-ibig, diin ang mga benepisyaryo makapalit sa mga lote nga ilang giokupar gikan sa Kagamhanang Probinsyal nga kasamta­ngang nanag-iya niini nga mga kabtangan.

Ang mga tag-iya sa balay kasamtangang nag-okupar sa hiniusang 51 ka ektarya nga yuta nga gipanag-iya sa Kagamhanan sa Probinsiya nga naa sa Barangays Busay, Luz, Lahug, Mabolo, Apas, Lorega, Kasambagan, Capitol Site, Tejero, Kamputhaw ug Kalunasan sa dakbayan sa Sugbo.

Kon ang tanang mga dokumento ug rekisitos ma-compile ug masumitir, ang Pag-ibig adunay 20 ka adlaw nga trabaho aron aprubahan ang loan application sa matag benepisyaryo.

Ang Pag-ibig unya maoy mobayad sa Kagamhanang Probinsiyal sa mga kabtangan nga gibaligya niini ug ibalhin ang pagpanag-iya ngadto sa mga benepisyaryo, kinsa mao unya ang manghulam ngadto sa ahensya nga mobayad sa amortization sulod sa usa ka panahon.

Ang mga benepisyaryo giawhag sa pag-andam sa pinansyal nga aspeto uban sa ubang bayranan sama sa mga documentary stamps, capital gains tax, ug transfer cost alang sa processing sa lot transfer. / EHP

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph