Gob. Garcia nakigsabot sa nag-unang cancer center sa Russia

Gob. Garcia nakigsabot sa nag-unang cancer center sa Russia
Gob. Gwen GarciaFile

Nakapirma na og kasabutan ang kagamhanan sa Lalawigan sa Sugbo tali sa nag-unang cancer treatment center sa Russia alang sa pagtambayayong sa mga scientific research ug pagpalambo sa katakos sa pag-ayo sa mga lainlaing oncological diseases o sakit sama sa cancer.

Sumala sa pahibalo sa Kapi­tolyo nga lakip sa gibisita ni Cebu Governor Gwendolyn Garcia mao ang Napolkov Cancer Center sa dakbayan sa Saint Petersburg diin gipangulohan ni Dr. Vladymir Mikhailovich Moisenco ang paglibot sa ilang bag-ong natukod nga outpatient facility nga makaakomodar og cancer patients gikan sa nagkadaiyang lokalidad sa ilang nasod.

Matod sa gobernador, nag­hinamhinam siya sa maong kalamboan ilabi na nga ang kagamhanan sa probinsya sa Sugbo maoy nagpadagan sa upat ka mga provincial ug 12 ka district hospitals.

Atol sa panagtigom, mipadayag og kaandam si Moisenco nga moabag sa pagpalambo sa mga tambalanan sa Sugbo.

Sa nasayran, ang Napol­kov Cancer Center usa sa pinakadako nga research ug treatment center sa Russia nga naghatag og espesyal nga medical care samtang ang researchers ug scientists niini maoy nagtuon, moila ug mosusi og pagtambal sa cancer.

Ang maong cancer center natukod niadtong 1927 ug maoy usa sa labing karaan nga medical institution sa Northwestern Federal district sa Russia.

Pinaagi sa maong kasabo­tan, gilauman nga maghatag og kapasidad sa mga ospital nga gidumala sa lokal nga ka­gamhanan sa Lalawigan sa Sugbo. / ANV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph