GITUDLO isip Provincial Council President sa Partido Demokratiko Pilipino–Lakas ng Bayan (PDP–Laban) alang sa Probinsya sa Sugbo si Gobernador Pamela Baricuatro.
Nanumpa si Baricuatro niadtong Biyernes, Hulyo 11, 2025, sa usa ka seremonyas nga gipahigayon sa Metro Manila.
Sa usa ka phone interview sa SunStar Cebu, matod ni Baricuatro nga ang appointment political ug di makaapekto sa iyang pamaagi sa pagdumala.
“Political gayud ni nga appointment ug ang akong pagdumala lahi ra niana,” matod ni Baricuatro.
Gipamatud-an usab niya nga nakig-alyansa na siya sa PDP–Laban atol sa iyang pagdagan pagka-gobernador sa eleksyon sa Mayo 2025, ug nidaog siya nga landslide.
Si Baricuatro nipahibalo usab pinaagi sa iyang opisyal nga Facebook page, nga nag-ingon: “I’m officially the Provincial Council President of PDP–Laban for the Pro-vince of Cebu.” / CDF