Gimando ni Gobernador Pamela Baricuatro ang pag-hire og 78 ka doktor aron ipakatap sa mga provincial ug district hospitals sa tibuok Sugbo.
Kini aron pagtubag sa kakuwang sa mga doktor ug pagpalambo sa serbisyo sa panglawas sa publiko.
Gihimo ang maong pahibalo niadtong Biyernes, Hulyo 18, pinaagi sa opisyal nga Facebook page sa Cebu Provincial Government.
Niining semanaha, nakadawat na ang Kapitolyo og 1,858 ka aplikasyon alang sa nagkalainlaing posisyon sa panglawas, apil na ang mga nurse, medical technologist, dentista, ug radiologic technologist.
Nahitabo kini human sa pipila ka semana nga pag-inspeksyon ug konsultasyon sa mga ospital nga gipangulohan sa anak ni Baricuatro ug pro-bono public health consultant, Dr. Elisse Nicole Catalan, ug sa Provincial Health Officer Mary Ann Josephine Arsenal.
Gikompirmar sa team ang lapad nga kakuwang sa mga doktor ug importanteng medical staff sa nagkalainlaing pasilidad sa tibuok probinsya.
Gihimo na ang profiling ug screening aron masiguro nga ang mga kwalipikadong personnel madestino kung asa sila labing gikinahanglan.
Gipahibalo pag-usab ni Baricuatro nga ang panglawas nagpabilin nga nag-unang prayoridad ubos sa iyang pagdumala.
Atol sa binulan nga tigum sa Association of Municipal Health Officers of the Philippines (AMHOP) – Cebu Chapter nga gipahigayon sa Mandarin Hotel, gipasaligan ni Baricuatro ang mga local health officer sa suporta sa Kapitolyo.
Tubagon sab sa Kapitolyo ang mga kakuwang sa mga tambal alang sa mga mabdos ug mga pasyente nga adunay diabetes o hypertension, ingon man ang programa alang sakit sa kidney.
Nakigtagbo usab si Baricuatro kang Department of Health (DOH) 7 Regional Director Joshua Brillantes, mga hepe sa mga ospital nga gipadagan sa DOH sa Sugbo, ug Gerardo Aquino Jr. aron hisgutan ang mga kakuwang sa pagpakatap sa workforce ug uban pang mga hagit sa lebel sa ospital.
Apil si Catalan sa tigum ug nagpresentar og dugang rekomendasyon aron mapaayo ang paghatod sa serbisyo sa mga pasilidad sa panglawas sa publiko.
Sa lahi nga inspeksyon, gibisitahan ni Baricuatro ug Catalan ang Minglanilla District Hospital ug nakita ang kadaot sa salog sa dietary section sa ospital.
Duha ka semana human sa pagpagawas og direktiba alang sa dinalian nga pag-ayo niini, 80 porsyento na sa trabaho ang nahuman.
Gipunting usab sa gobernador ang mga estudyante atol sa Academic Forum 2025 nga gipahigayon sa University of San Carlos – Talamban Campus, diin iyang gihisgutan ang agenda sa panglawas sa iyang administrasyon ug ang mga paningkamot sa pag-apil ug paghatag og gahum sa mga batan-ong lider.
Gawas sa mga butang bahin sa panglawas, nakigtagbo usab si Baricuatro sa mga opisyal gikan sa Department of Trade and Industry (DTI) 7 aron susihon ang mga paagi sa pagsuporta ug pagpalambo sa micro, small, and medium enterprises (MSMEs) sa probinsya. / CDF