Dili motugot ang gobiyerno sa Pilipinas sa ilang mga lungsuranon nga ma-deport sa third country, matod ni Philippine Ambassador to the United States Jose Manuel Romualdez niadtong Martes, Mayo 27, 2025.
Siya niingon nga dawaton sa Pilipinas ang bisan kinsa nga Pilipino bisan unsa pa ang ilang kahimtang sa imigrasyon.
Ang embahador nagpagawas sa pahayag isip tubag sa mga pangutana sa mga peryodista nga niapil sa “Friends, Partners, Allies Reporting Tour Program” bahin sa mga undocumented Filipino nationals nga posibleng ma-deport sa third country.
Gibanabana ni Romualdez nga anaa sa 250 ngadto sa 300 ka mga Filipino ang na-deport sa tibuok US sukad sa pagsugod sa pagsumpo sa mga illegal immigrant karong tuiga.
Kini nahitabo tungod sa gibag-o nga mga immigration policy ni US President Donald Trump nga gisugdan dayon human sa inagurasyon sa iyang ikaduhang termino kaniadtong Enero 20, 2025, diin agresibo nga gipadayon ang paggamit sa mga deportasyon sa third country.
Naglakip kini sa pagtangtang sa mga migrante dili sa ilang nasod nga gigikanan apan sa usa ka third country diin adunay kasabutan ang US.
Gipasabot sa embahador nga sa dihang nitumaw ang mga panaghisgot bahin sa mga deportasyon sa third country, ang Philippine Embassy daling nakig-communicate sa US government aron mahibaw-an kon si kinsa ang mga Filipino nga gikatakdang i-deport ug aron mapadali ang ilang pagbalik sa Pilipinas.
“The Philippine government made it very clear to the United States government that we will accept all Filipinos. In other words, we definitely would not want them to be deported to a third country,” matod ni Romualdez.
“It’s not in our DNA to allow that to happen. We will accept any Filipino no matter what their status is and no matter what they are,” dugang niya. / MVG