Nikulit og kasaysayan si Carlos Edriel Yulo isip labing unang gymnast sa Pilipinas nga nakalabni og gold medal sa Olympics.
Iya kining nahimo human niya napatigbabawan ang men’s floor exercise final round sa artistic gymnastics event sa Paris Games niadtong Sabado sa lawom sa gabii, Agusto 3, 2024 (PH time) sa Bercy Arena sa France.
Tataw nga puno sa determinasyon, ang gitawag og Caloy sa Philippine gymnastics nirehistro og 15.000 puntos aron lupigon ang laing pito ka dekalidad nga finalists gikan sa nagkalainlaing nasod.
Sukad masukad, mao kini ang labing unang higayon nga nakaabot og 15.000 si Yulo, 24, kinsa lumad nga taga Malate, Manila. Sa qualification round, si Yulo nitali og 14.766 samtang 14.333 sa all-around final.
Ang 4’11” nga si Yulo maoy ikaduha pa lang nga atleta sa Pilipinas nga nakalangkat og gold medal sunod ni weightlifter Hidilyn Diaz, kinsa nakahimo niini sa niaging edisyon sa matag upat ka mga tuig nga kompetisyon nga gipahigayon sa Tokyo, Japan.
Si Yulo labing unang nihamag sa Olympics sa Tokyo edition apan nagkagidlay ang kampanya niini diin igo lang siyang nahiluna sa ika-44 overall sa individual all-around, ug wala siya naka-qualify sa iyang paboritong floor exercise.
Apan wala nawad-an og paglaom si Yulo ug padayon kini sa pagkampanya sa tinguha nga maabot ang tumoy sa kalampusan.
Atol sa medal ceremony sa Paris, daw dili pa makatuo si Yulo nga naabot na niya ang tumoy sa kalampusan.
Nagkurog si Yulo nga naggunit sa iyang ulo atol sa iyang pagdawat sa gold medal ibabaw sa podium.
Niangkon sa silver medal mao si Tokyo gold medal winner Artem Dolgopyat sa Israel (14.966) samtang ang nikuha sa bronze mao si Jake Jarman sa Great Britain (14.933). / ESL