Gipapaspasan ni Mayor Thadeo “Jonkie” Ouano ang paghuman sa bag-ong Government Center sa Dakbayan sa Mandaue nga anaa gitukod sa luna atubangan sa karaang Cebu International Convention Center (CICC).
Atol sa iyang pag-inspeksyon sa lugar niadtong Biyernes, Hulyo 18, gitataw ni Ouano ang kadinalian sa pagbalhin sa ubay-ubayng opisina sa gobyerno ngadto sa bag-ong edipisyo aron mapalambo ang paghatod sa serbisyo publiko ug makunhoran ang galastuhan sa operasyon.
Sa pagkakaron, 12 porsyento pa lang ang nahuman sa proyekto.
Matod niya, sumala sa kontraktor nga WT Construction, ang unang duha ngadto sa tulo ka andana sa 10-andana nga building mahimo nang okupahan sa katapusan sa sunod tuig.
Kini nga mga andana magsilbing opisina sa gobiyerno, lakip na kadtong kasamtangang nag-abang og mahal nga pribadong luna.
“For example, our Mandaue Investment Promotion Tourism Action Center (MIPTAC) office is currently paying P400,000 per month in rent. If we can move them into the new building early, we could already start saving a significant amount,” matod ni Ouano.
Dugang ni Ouano nga gikonsiderar sa siyudad ang paggamit og phased approach sa konstruksyon, susama sa ilang plano alang sa umaabot nga Mandaue City Hospital.
Matod niya ang pag-abli sa ubos nga mga andana samtang gitukod pa ang ubang bahin sa building makatabang pagsulbad sa problema sa luna sa nagkalainlaing opisina sa siyudad.
Ang bag-ong Government Center kabahin sa P3 bilyunes nga development plan nga gikasabutan sa miaging administrasyon.
Matod ni Ouano, sa maong kantidad, P2.5 bilyunes ang gigahin alang sa building mismo, samtang P500 milyunes ang sa pasilidad ug internal requirements.
Ang Mandaue nagtinguha og Public-Private Partnership (PPP) aron matabangan ang pagpundo sa rehabilitasyon ug paggamit sa karaang CICC site, ug matabangan sa pagbayad sa gasto sa Government Center.
Ang P3 bilyunes nga loan gipundohan pinaagi sa Development Bank of the Philippines (DBP) nga adunay 3.5 porsyento nga tinuig nga interest rate.
Ang siyudad kasamtangang nagbayad lang sa interes, nga mokabat og P105 milyunes kada tuig, sulod sa unang tulo ka tuig.
Human niana magsugod na ang siyudad sa pagbayad sa interes ug sa principal. / CAV