Giulo sa pagpusil ang job order employee sa Cebu City Hall sa dihang maoy pag-abot sa ilang balay sa alas 8:15 sa gabii, Lunes, Agusto 4, 2025, sa Block 2, General Gines Street, Barangay Suba, Siyudad sa Sugbo.
Ang biktima gialyasan og Rolly, 46, nga nadestino sa Cebu City Zoo. Base sa pasiunang imbestigasyon sa Sawang Calero Police Station 6 sa Cebu City Police Office (CCPO) nga ang biktima nahagba diha sa pultahan sa dihang nisulod na sa ilang balay nga gisundan sa usa ka lalaki nga armado.
Sa way pagduhaduha gipusil si Rolly tumong sa iyang ulo sa makadaghang higayon ug nakasaksi ang anak nga lalaki ug nisibat dayon ang suspek sakay sa kolor blue nga motorsiklo.
ADUNAY HULGA
Sigon sa kabanay sa biktima nga aduna nay nadawat nga hulga sa iyang kinabuhi ang biktima tungod sa giingong adunay relasyon sa babaye nga minyo nga taga Barangay Busay, Dakbayan sa Sugbo.
Gumikan sa maong rebelasyon, gisubay sa kapulisan ang anggulo sa love triangle.
Sa nagpadayon nga imbestigasyon gibutyag ni Police Lieutenant Colonel Maria Theresa Macatangay, deputy city director for operation sa CCPO nga ang gitumbok nga gunman mao ra sab ang bana sa giingong gikarelasyon sa biktima.
Gilusad ang hot pursuit operation sa kapulisan apan wala na ang suspek ug ang babayeng giingong gikarelasyon sa biktima sa pinuy-anan sa Sitio Plaza, Barangay Busay.
“According sa witnesses sa family is ang katong lalaki nga napusilan naa siyay paramour nga minyo pud and kadto nga bana sa iyang karelasyon is maoy suspek sa pagpatay,” dason ni Macatangay.
“Naay mga witness nga nakaila ug nakatumbok sa shooter and as we speak padayon ang pagpangita nato niya,” dugang pa sa opisyal.
Sigon sa nakuha nga kasayuran nga dugay na ang relasyon sa biktima ug sa asawa sa suspek nga gituohan nga wala na makaantos.
Nihimo ang kapulisan sa pag-backtrack sa mga kuha sa CCTV sa dapit alang sa pagpalig-on sa ilang ebidensya. /