Gipasalig sa Malacañang niadtong Biyernes nga himoon sa gobiyerno ang tanang pamaagi aron maseguro ang pagbalik ni kanhi Ako Bicol Party-list Rep. Zaldy Co sa Pilipinas.
Sa iyang pakighabi sa mga tigbalita dungan sa pag-apud-apod sa hinabang sa gobiyerno sa Batangas City, giingon ni Executive Secretary Ralph Recto nga ang Department of Justice (DOJ) na ang nagdumala sa maong butang.
Matod niya, ang mga update maggikan na sa DOJ, dungan sa pag-ingon nga si Justice Secretary Frederick Vida ang anaa sa saktong posisyon aron mohatag og detalyadong katin-awan bahin sa sitwasyon ni Co.
“Secretary Vida will be back in a few days. He will provide some clarification,” dugang ni Recto.
“It is best that he answers the question. Wala pa akong update tungkol diyan. But rest assured na gagawin ng ating pamahalaan ang lahat ng dapat magawa para maibalik si Zaldy Co, ” pahayag niya.
Giisip na karon nga usa ka pugante si Co samtang nag-atubang og mga kaso tungod sa iyang kalambigitan sa mga anomaliya sa mga flood control project.
Giklaro sa DOJ nga ang pulong nga “arrest” o pagdakop mahimong dili haom nga gamiton sa paghulagway sa mga aksyon nga gihimo sa mga awtoridad sa Czech batok ni Co.
Matod sa Malacañang, ang kaso ni Co naglambigit sa isyo sa immigration inay pormal nga pagdakop, tungod sa iyang kapakyasan sa pagpakita og saktong mga travel document.
Si Vida ug ang iyang team nilupad na paingon sa Prague aron makig-alayon sa mga awtoridad sa Czech ug maseguro ang pagbalik ni Co sa nasod. / PNA
