PANGABUBHO ang hinungdan nga natigbasan-patay sa uyoan nga si George Goc-ong Batomalaque ang 18-anyos nga pag-umangkon sa iyang asawa nga si Kyle Padilla.
Nagtuo siya nga dunay relasyon ang iyang asawa kay sukad nga naospital ang inahan sa biktima dili na kini mouli sa ilang balay sa Barangay Vito, Lungsod sa Balamban.
Gawas niini, nipasangil sab si Batomalaque nga iyang nakita ang biktima nga nagkupot sa iyang kinatawo samtang nanglaba ang iyang asawa.
Tungod niadto, naglu-ngot-lu--ngot na ang suspek nga iya'ng patyon ang biktima.
Matod niya atol sa pakighinabi sa DyHP nga dili unta niya tuyo nga maapil ang duha ka manghod nga nagpangidaron pa og 10 ug 8 anyos nga naa pa sa tambalanan ug talandugon ang mga kahimtang.
Nisamot ang iyang pagduda nga dunay relasyon ang iyang asawa sa biktima tungod kay kon gikan kini sa Siyudad sa Sugbo nga nagbantay sa igsuon nga gioperahan sa matris, dili kini mouli sa ilang balay ug modiretso sa Barangay Owak, Asturias.
Iyang giingnan ang iyang asawa nga mouli sa ilang balay kay daghang labhunon nga wala na maatiman sukad nga dili na kini mouli.
Dinhi na siya napungot ug daw sa tinuod ang iyang pagduda nga dunay relasyon ang iyang asawa ug ang pag-umangkon niini.
“Ako na siya giingnan nga uli sa sa balay, dili man siya mouli kay manglaba kuno siya sa balay aning akong pag-umangkon,” dugang ni Batomalaque.
Gihimakak sa suspek nga tiggamitan siya sa ilegal nga drugas apan nakasuway na mogamit.
Ang duha ka manghod nga silang Gerald Steven Apduhan, 10, ug si Princess, 8, padayon pa nga giatiman sa mga doktor sa tambalanan. / AYB