Nalumos ang usa ka grade 12 nga tinun-an nga nilayat sa dagat sa Boardwalk, Barangay East Poblacion, dakbayan sa Naga, alas 3:00 sa hapon sa Miyerkules, Enero 10, 2023.
Ang biktima (pangan gipugngan ning mantalan), taga Sityo Tabtuy, Barangay Tuyan, siyudad sa Naga.
Sa pakisusi sa Superbalita Cebu, nasuta sa imbestigasyon sa kapulisan sa siyudad ubos sa kamandoan sa ilang hepe nga si Police Lt. Col. William Homoc nga ang bata wa mosud sa ilang klase ug nisuroy sa Boardwalk ug nakit-an kini nga niambak sa dagat.
Nasayran sa Superbalita Cebu nga gidili ang pagkaligo sa dagat sa maong dapit tungod sa risgo sa kalawom niini.
Sumala sa kapulisan, ang maong grade 12 nga tinun-an gisuwayan sa pagluwas sa mga estambay apan naunlod kini hinungdan nga dali silang nanawag sa security guard sa Boardwalk ug mga sakop sa Naga City Disaster Risk Reduction Management Office (NCDRRMO).
Dihang nahaw-as ang bata gikan sa dagat, gitabang sa mga rescuer pinaagi sa pag-revive ug gidala sa Vicente Mendiola Center for Health Lying-In, apan gideklarar nga patay na.