Grade 9 ‘na-rescue’ sa dihang gi-buy bust sa kapulisan

RONDA SA DRUGA: Nasikop ang no. 10 nga tipayuhot og gidiling drugas sa Dakbayan sa Lapu-Lapu sa ronda sa kapulisan sa Brgy. Pusok, alas 6:11 sa gabii sa Miyerkules, Mayo 22, 2024. / GIKAN SA LAPU-LAPU CITY POLICE OFFICE
RONDA SA DRUGA: Nasikop ang no. 10 nga tipayuhot og gidiling drugas sa Dakbayan sa Lapu-Lapu sa ronda sa kapulisan sa Brgy. Pusok, alas 6:11 sa gabii sa Miyerkules, Mayo 22, 2024. / GIKAN SA LAPU-LAPU CITY POLICE OFFICE

“Na-rescue” sa mga sakop sa Carbon Police Station ang usa ka grade 9 nga lalaki atol sa buy-bust alas 11:30 sa gabii sa Miyerkules, Mayo 22, 2024, sa Sitio Bato, Barangay Ermita, Dakbayan sa Sugbo.

Si ‘Ran-ran’ (di tinuod ngan), 16, nagpuyo sa maong lugar, nakuhaan og 12 ka pakete sa gituohang shabu nga motimbang og .8 grams nga dunay standard drug price (SDP) nga P5,440.

Sa imbestigasyon sa kapulisan, nasayran nga siya napugos sa pagpamaligya sa ilegal nga drugas aron dunay ikapalit og pagkaon.

Si Police Lt. Colonel Janette Rafter, deputy city director for administration sa Cebu City Police Office (CCPO), nagkanayon nga naa na sa kustodiya sa Women and Children Protection Desk (WCPD) ang maong tinun-an ug gipaubos na sa intervention.

Matod ni Rafter, nakig-alayon na sila sa mga ginikanan sa menor ug gipangayoan na nila og birth certificate aron pagseguro kon tinuod ba ang iyang edad.

Ang maong tinun-an gipaubos sa intelligence surveillance.

Dili na bag-o sa kapulisan ang pagkalambigit sa mga menor de edad sa pagpamaligya sa ilegal nga drugas.

Ubos sa Juvenile Justice and Welfare Act of 2006, ang termino nga gamiton sa mga otoridad sa pagkasikop sa mga menor nga nalambigit og krimen mao ang “rescue.”

Samtang, malampuson usab ang pagkasikop sa no. 10 sa pagpayuhot og gidiling drugas sa Brgy. Pusok, siyudad sa Lapu-Lapu, alas 6:11 sa gabii sa Miyerkules, Mayo 22, 2024.

Usa ka 35 anyos nga si alyas “Budo,” taga Purok Sambag, Brgy. Canjulao, Lapu-Lapu City, nasikop sa joint buy-bust sa City Intelligence Unit (CIU), City Drugs Enforcement Unit (CDEU) ug Lapu-Lapu City Police Office (LCPO) ubos kang P/Col. Ali A. Baron, officer-in-charge sa LCPO uban sa koordinasyon sa Philippine Drug Enforcement Agency (PDEA 7).

Sa dihang nadakpan, nasakmitan pa siya og laing siyam ka putos nga plastik sa gituhoang shabu nga gibana-banang motimbang og 50 gramos nga may standard drug price nga P340,000.

Ang suspek gitanggong sa LCPO ug nagpaabot sa tukmang kaso nga ipasaka batok kaniya. / AYB, DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph