Usa ka 40 anyos nga lalaki nasakmitan og granada ug .38 kalibreng revolver sa pagronda sa balay niini sa Brgy. Canbanua, lungsod sa Argao, alas 3:40 sa hapon sa Martes, Marso 5, 2024.
Ang kapulisan sa Argao, ubos sa pagpangulo sa ilang hepe nga si Police Maj. Ivy Martin Bartolome, ni-serve sa search warrant sa balay ni Jims Rhob Oyangoren Matura, minyo.
Ang warrant giisyo ni Judge May Faith L. Trumata-Rebotiaco, Vice Executive Judge sa Regional Trial Court (RTC) 7th Judicial Region sa Argao.
Nasuta sa kapulisan nga ang suspek dili awtorisado nga magtiner og granada ug ang armas dili usab lisensyado.
Ang pagronda sa balay sa suspek gisaksihan sa pipila ka mga opisyal sa barangay.
Ang suspek gibalhog na sa bilanggoan sa Argao ug gikatakda nga pasakaan og tukmang kaso sa ilegal nga paghupot og armas ug eksplusibo. / DVG