Human sa tulo ka tuig nga wa ipahigayon ang grand procession sa Black Nazarene, gikatakdang mobalik kini atol sa 2024 nga kapistahan sa maong patron.
Base sa kalendaryo sa mga kalihukan nga gipagawas sa Simbahan sa Quiapo, ang “Traslacion” maoy usa sa mga kalihukan alang sa tinuig nga kapistahan niini karong Enero 9.
Ang “Traslacion” nailhan nga grand procession, diin ang pagbalhin sa Itom nga Nazareno gikan sa Quirino Grandstand ngadto sa Quiapo Church gipatuman na usab.
Sulod sa mga dekada, ang grand procession sa Black Nazarene gipahigayon matag Enero 9 diin gatusan ka libo ka mga deboto ang ningduyog sa maong aktibidad.
Sukad sa 2021, hinuon, ang engrande nga prosisyon giundang sa mga opisyal sa simbahan tungod sa pagkatap sa coronavirus disease (Covid-19).
Atol sa 2023 nga Kapistahan sa Itom nga Nazareno, ang Quiapo Church nipaila sa “Walk of Faith” procession, nga wala maglakip sa mga imahen sa itom nga Kristo.
Ang “Walk of Faith” namatikdan nga dili kaayo daghan og mga deboto ug nahuman sa mas mubo’ng panahon itandi sa engrande nga prosisyon, nga kasagaran molungtad sa tibuok adlaw.
Matod sa Quiapo Church, ang rota sa prosesyon magsugod sa Quirino Grandstand, mosubay sa mas taas nga rota sa Plaza Miranda paingon sa Quiapo Church.
Ang “Traslacion” sugdan sa vigil ug mga programa nga ipahigayon sa Quirino Grandstand sugod sa Enero 8 sa alas 6:00 sa gabii.
Si Manila Archbishop Cardinal Jose Advincula gikatakdang mangulo sa misa sa tungang gabii sa Enero 9, didto usab sa Quirino Grandstand.
Human sa Misa, ang tibuok gabii nga pagbantay ipadayon hangtod sa dili pa ang dako’ng prosisyon.
Sa Quiapo Church, ang mga misa sa fiesta ipahigayon matag oras gikan sa alas 3:00 sa hapon sa Enero 8 hangtod sa alas 11:00 sa gabii sa Enero 9. HDT, SunStar Philippines