Mga duwa karon:
7:15 pm- USPF batok UC
8:30 pm- USJ-R batok BC
Gipanglampornas sa University of the Visayas (UV) Green Lancers ang University of San Jose Recoletos (USJ-R) Jaguars, 83-62, niadtong Dominggo sa gabii, Enero 26, 2025, atol sa pagsugod sa Bulacao Talisay Sinulog Cup Inter-Collegiate basketball tournament sa Bulacao Sports & Activity Center sa Brgy. Bulacao, Dakbayan sa Talisay.
Ang Green Lancers ni coach Gary Cortes gipangulohan nila ni Rovello Robles ug Bengil, kinsa ningrehistro og 13 puntos kada usa.
Sama sa gilauman, ang Green Lancers, kasamtangang kampiyon sa Cebu Schools Athletic Foundation Inc. (CESAFI), mao ang nagkontrolar sa kinatibuk-ang duwa.
Sa laing kombati, gipangkawras sa Benedicto College (BC) Cheetahs ang University of Cebu (UC) Webmasters, 81-78.
Ang torneyo, nga nagdalit og kapin sa P100,000 nga ganti, gisalmutan og unom ka teams sa CESAFI.
Ang laing duha ka mga partisipante mao ang University of Southern Philippines Foundation (USPF) Panthers, ug University of San Carlos (USC) Warriors.
Ang CESAFI sanctioned tournament suportado ni Bulacao Brgy. Captain Banjo A. Abastillas ug sa Barangay Council. / ESL